الشاعر سعيد عقل

مقابلة مع ليلى رستم

فكر سعيد عقل الاقتصادي (00:00:00)
(خمس دقائق وأربعون ثانية)

س ـ الجرائد إلّي بـ تكتب فيهم دائماً بـ تلجأ للإحصاءات بشكل واضح قوي. أولاً منين بـ تجيب الإحصائيّات دي؟ (00:00:07)

ج ـ بالحقيقة العالم بـ يتصوّروا إنّ عندي مصادر للإحصاء غير المصادر الموجودة بين أيدي الناس. بالحقيقة كل رقم أنا نشرته بـ تقدري تشوفيه مكتوب بالجرايد قبل بيوم أو قبل بجمعة، إنّما أنا بفرق عن غيري بأنّي الإحصاء ما بخلّهش أعمى. مثلاً بيكتبولك إنّ بلديّة بيروت السنة ميزانيتها 72 مليون ليرة أنا ما بخلّي هـ الرقم هيك أعمى، 72 مليون بيقدر يسأل الواحد كثير ولاّ قليل؟ أنا بخلّيه يجاوب كنّه كثير ولاّ قليل. بقلّه 72 مليون ليرة أنت ما بحياتك صرفتهم حتّى تعرف كنّهم كثار والاّ قلال، هوذي مش مثل حقّ فستان لتعرفي كنّه هـ الرقم إلّي اعطيتيه لتشتري فستان كثير أو قليل، ما حدا منّا صرف 72 مليون. بنيزل الرّقم لمستواه، بقسم 72 على 365 يوم وبرجع بقسمه على 16 مليون متر وشوي إلّي هنّ أمتار بيروت يعني مساحة بيروت، بـ يطلع بالنهار للمتر الواحد لليوم الواحد قرش فاصل 12، حالاً صرتي بـ تعرفي حضرتك إنّ متر إذا صرفنا عليه بالنهار 1.12 قرش ما فينا نجبله واحد "يكشّ الدبّان" عنه، كيف بدنا نجي نعمل عليه دار للأوبرا ونعمل مترو تحت منه؟ بدها أكثر بكثير. ساعتها فوراً بقول هـ الرقم ما بـ يسوى لازم نرفع ميزانيّة بلديّة بيروت كثير، وبـ ارجع بـ اضربه على رأسه للقارىء بإحصاء ثاني. بقلّه تـ نشوف بـ أوروبا وبـ أميركا قدّيش بـ يصرفوا على المتر المربّع في المدينة إلّي مثل بيروت، بفرجيه إنّه بين 22 و28 قرش بـ يلحق المتر عنده بدل 1.12 قرش، بـ ينصرعوا الناس وبـ يخمّنوا إنّه أنا جبت رقم مش موجود، إنّما أنا فسّرت الرقم فجّرته وصيّرته حبيب لقلب الناس، يا بـ يهاجموه يا بـ يحبّوه.

س ـ طيّب منين بـ تجيب الإحصائيّات؟ (00:02:26)

ج ـ الدولة بـ تنشر إحصائيّات والجامعات عندنا بـ تنشر إحصائيّات، وزارة التصميم بـ تنشر إحصائيّات. قلتلّك مش أرقامي الغريبة، شرح أرقامي إلّي بـ يحبّب فيه، وأنا أبيع شرح أرقام بـ مقالاتي مش أبيع أرقام. الأرقام موجودة بين إيدين كلّ الناس بس بـ ينشروها ما حدا بـ يحبّها، بـ انشرها أنا بـ تصير تعطي شي. رقم جاي عم يدفّعوه لكبار الأغنياء مش للأغنياء، إذن حجّتي قويّة. من هون العالم بالموازنات الدكتور خطّار شبلي إلّي كان مدير الموازنة عندنا وإلّي بـ يعلّم علم الموازنات بالجامعات بـ يشدّد على إنّه أنا دير الموازنة وبـ يشدّد على نظريّتي بالموازنة، فإذا كنت عم قلّهم للسوبر أغنياء يدفعوا 12 ألف ليرة إلّي أنا بـ ادفعه كلّ سنة لنصلّح لبنان، هذا بـ يجبلنا بالضبط مليار و200 مليون، يعني إذا دفّعناهم 12 ألف ليرة قدّ جايزتي ما بـ ادفعلها أنا بالسنة، إذا دفّعناهم لكبار الأغنياء مش للأغنياء هـ الرقم هذا، بـ يكون عندنا مليار و200 مليون، تصوّري الـ 8 مشاريع بقى إلّي بـ افرض إنّه بدّه يعملها هـ الرقم الجديد هذا، وهذا مش لازم لبنان يتنازل عنّه، والأغنياء عندنا لازم ينقذوا موازنتهم ويدعموا دولتهم بالحكي مش بالفعل.

س ـ بالفعل مش بالحكي. (00:04:01)

ج ـ آ pardonبالفعل مش بالحكي.

س ـ بـ اقول إيه أستاذ سعيد، قلت دلوقتي مئة ألف سوبر riche. (00:04:05)

ج ـ عندنا مئة ألف سوبر غني.

س ـ بتقدّر ثروة السوبر غني بكم؟ (00:04:07)

ج ـ لازم يكون مدخوله لنعتبره سوبر غني لازم يكون مدخوله فوق الـ 100000 ليرة، مدخوله الصّافي فوق الـ 100000 ليرة بالسنة.

س ـ ده الّي تعتبره في فئة السوبر riche عايز تدفّعه ضريبة تصاعديّة؟ (00:04:24)

ج ـ معلوم، ما في هوذي مش كلّهم هوذي بـ يدخّلوا 100000 ليرة، في منهم بـ يدخّلوا 200000، في منهم بـ يدخّلوا مليون و 2 و3 ملايين. نحن مـ ناخذ الـ Moyenne مـ نقول معدّل كذا.

س ـ بدّك تعمل ضريبة تصاعديّة على الأغنياء؟ (00:04:47)

طبعاً، هيذي technique أخذ الضريبة هذا موضوع ثانوي تمام، في technicien لفرض الضريبة، إنّما بدّنا نقرّها لهـ الضريبة، بدّنا نقرّها.

س ـ تعتقد إنّ لبنان على صغر حجمه وعدد سكانه يستطيع إنّه فعلاً ينمو إقتصادياً، ينمو بمجرّد تطبيق نظام الضرائب؟ ده يكفي؟ (00:04:55)

ج ـ معلوم، بالقرن العشرين صار ثابت (حبيبتي) إنّ الموازنة شي مهم، مش بس لنغذّي الدولة البوليسيّة مثل ما كانوا يسمّوها بالأوّل، صار الموازنة إلها دور يسري الشعب وإلها دور بـ يحميه وبـ يحمي الإقتصاد. الموازنة ما عادت مصروف بس، لا، الموازنة بـ تقدر تغيّر السياسة، تغيّر السياسة تمام.

جائزة سعيد عقل - طفولته وعلاقته بوالديه (00:05:40)
(تسع دقائق وتسع ثواني)

أمّي بـ تحبّني وهي بـ تنحب كثير والبلد إلّي عشنا فيها زحلة، كانوا يحبّوها كثير لأمّي، وأمّي إلها حسَنة كبيرة إنّها حمَلتلي بيّي. كان عندي بيّ لا يُطاق، كان كريم وكان عنيف الشخصيّة، إنّما ما كنش معلّم مثلها، هي كانت معلّمة كثير. عن أمّي أخذت أشياء حلوة وعن أبوي أخذت حبّي للمطلَق وعدم المسايرة وخصوصاً أخذت عنه، عطاني درس بالكرَم وما بـ انساه. جابني مرّة واعطاني "متليك" كان عمري 5 سنين، اعطاني "متليك" وعند عشيّة، "المتليك" يعني أصغر قطعة يومتها.

س ـ تركيّة كانت؟ (00:06:35)

ج ـ تركيّة نعم، من "ميتاليك" جايبينها بالفرنساوي، كما نسمّيها "متليك" بلغتنا، جابني وعشيّة قال لي: "شو عملت بـ "المتليك"؟ قلتلّه: "اشتريت سمسميّة". السمسميّة عندنا نوع من الدْراجِيه، نوع من الحلو. قال لي: "يعني أنت عطيت وأخذت؟ لأ، بدّي ياك كنت تعطي وما تاخذ. قلتلّه: "كيف"؟ قال: "كنت فيك هذا تصرفه بخمستين صغار، خمسة تشتري فيها سمسميّة وخمسة تعطيها لجارتنا الفقيرة الختيارة. هي جارة ما بـ تعطيك شي. ومن يومتها عوّدني إنّي أعطي لـ ما آخذ شي. وصار لي فضيحة بعقلي وقت إلّي قالولي بالزمان بالدرس إنّه "إلّي بـ يعطي بـ يقرض ألله"، بـ يقرضه بـ يديّنه. انزعجت قلت: "أنا مش لازم نقرضه، لازم نعطيه وبس". وبعدين بس كبرت ضلّيت طبّق مبادىء أبوي "إنّ كلّ شي أربح منّه أعطي جزء منّه بالميّة، عشرة بالميّة، 15، واليوم يمكن جايزتي هي صورة مكبّرة نتفة عن هـ العطاء. أنا ما بـ اصرف على سعيد عقل شخصيّاً قدّ ما بـ اصرف على بلادي بهـ الجايزة، هيذي ورثة من أبوي وما بـ انساها. وبـ اذكر إنّ وقت إلّي أنشأت جايزتي قالتلي أمّي، قالتلي أمّي: "لو بيّك طيّب كان بـ يشوفها صغيرة عليك". وأنا بـ احلم إنّي كبّرها إكراماً لأبوي إلّي يمكن يكون شايفني هلّق.

س ـ أكيد أو حاسس بيك يمكن. لكن في جايزة ثانية أظن تعطيها باسم الوالدة؟ (00:08:25)

ج ـ هيذي انعطت مدّة سنة في زحلة بعد ما توفّت أمّي وبس، كانت معمولة لتنعطى مدّة سنة، يا ريت فيني كمّلها، أرباحي ما بـ تسمحلي إنّي كمّلها وأعمل جايزتين. إنّما أمّي هيذي مدينلها أنا بشيء ثاني يمكن هي إلّي عرّفتني على شيء أكثر من الكرَم، عرّفتني على الله وعـ الزمان. الزمان موضوع كثير بـ يهمّني، يمكن كلّ فلسفتي السياسيّة عايشة عليه. إنّي بـ اذكر أنا وصغير كسرت إناء زهور وزعلت خمّنت الدّني كلّها تزلزلت فيّي لمّا كسرت هـ الإناء. عرفت أمّي وإجت وهي عم تسلّيني وتقلّي: "بسيطة"، اشتلقِت أنّ أنا تصوّرت إنّ هـ الكرة إلّي بـ يفرجونا إيّاها بالمدرسة إنّها بـ تمثّل الأرض، تصوّرتها إنّه شي يوم راح تنكسر مثل هـ الإناء، وقلتلّها لأمي: "مثل ما انكسر هـ الإناء الزجاج يمكن تنكسر فينا هـ الكرة إلّي اسمها الأرض". قالتلي: "لا، هيذي ما بـ تتكسّر بسهولة وبيحميها الله". ويومتها يمكن كلمة "الله" إلّي بـ يحمي هـ الكرة من إنّها تنكسر، كبرت براسي وسألتها: "مين الله"؟ وعرّفتني عليه.

س ـ كيف عرّفتك؟ (00:10:06)

ج ـ قالتلي، قالتلي: "تصوّر إنّ أنا فلّيت من هـ الوجود قدّيش إنت بدّك تزعل"؟ قلتلّها: "كثير". قال: "فإذن إنت بـ تحبّني كثير، هذا الله هو إلّي خَلَق هـ الّي بـ تحبّه كثير إنت، وهو بـ ينحَبّ أكثر من هـ الشخص إلّي هو أنا إلّي بـ تحبّه كثير". طبعاً قالتلي إيّاهم أمّي بشكل طفولي، غرزوا براسي وعرفت إنّي أخلط يومتها بين الحبّ وبين "ألله"، عرّفتني "ألله" من خلال الحبّ، ما بـ انسى هـ النتيجة.

س ـ ربّما ربّما ده مدخل حبّك للتعرّف على اللاهوت وعلم النفس ومعرفة "الله". (00:10:43)

ج ـ صحيح معقول معقول.

س ـ أيمتى توفّت والدتك أستاذ سعيد؟ (00:10:54)

ج ـ لازم يكون صارلها شي 6ـ7 سنوات.

س ـ ووالدك توفي أيمتى؟ (00:11:02)

ج ـ أو، كثير، والدي توفي من 25 سنة وأكثر يمكن.

س ـ ما بـ تذكرله حادثة عنيفة معك؟ ذكرتلّه إنّه علّمك الحَسَنة والعطاء بدون مقابل، لكن ما كان عنيف معك؟ (00:11:06)

ج ـ كثير، مرّة طلبت منّه، طلبت منّه قطعة مال إسمها "مجيدي"، ما كان معه، عطاني أكثر، شعرت إنّه هـ الأكثر بدّه ياخذه منّي بعدين، أنا مش خرج يعطيني أكثر، أصرّيت إنّه يعطيني القطعة هذيك، وقمت القيامة بهاك الليل. كان عندنا ثلج بزحلة، بـ يحملني وبـ يزتّني، عمري شي عشر سنين تخمين، بـ يحملني وبـ يزتّني من الشبّاك، طبعاً في ثلج برّا، كان هو عرفان، وقعت على الثلج. رحت على الكنيسة، كان حوالي عيد الميلاد وبالكنيسة كانوا عم بـ يركّبوا العذرا والمجوس مثل ما بـ يعملوا عندنا، لبّسوني شافوني بردان هـ النسوان، لبّسوني ثوب من أثواب المجوس. المجوس عند النسوان الختياريّي هنّ ملوك، ولمّا أجوا ثاني يوم أختي وخيّي لياخذوني على البيت شافوني لابس أثواب مجوس، وتذكّرت هـ الخبريّة بعد شي 40 سنة مدري 35 سنة من هـ الحادثة، وكان الرئيس كوبيتشيك ضيف عندنا بزحلة وأنا عمّ بـ اعملّه خطاب. والرئيس كوبيتشيك باني برازيليا. أنا مُعجَب فيه كثير وكان جاي من بعلبك، ربطت له بين بعلبك إلّي هي إحدى أعظم بنايات الأرض إذا ما كانتش أعظمها وبينه هو كباني برازيليا، هـ البنّاء العظيم، خلطت له بين البناة اللبنانيّين إلّي بنوا بعلبك وهو كباني برازيليا. كان خطاب عجَبه وقام ردّ عليّ وقال: "أنا خطبت بحياتي كرئيس وسمعت تقريباً 5000 خطاب، هـ الخطاب هذا أجملهم. ومن يومتها صرنا صحاب أنا وهـ الرئيس وذكرلي كلمة بالفرنساوي قال لي:" أنت مجوسيّ الكلمة" كلمة بالفرنساوي حلوة. تذكّرت أنا الحادثة إنّه أنا كنت صغير مجوس، قلتلّه: "بـ اعرف". العالم خمّنوا إنّ عم بـ اتكبّر وعم بـ اتبجّح، بالواقع كنت عم بـ اتذكّر حادثة طفولتي وأضحك إنّه صحيح أنا مجوسيّ.

س ـ واضح قوي من كلامك عن والدك ووالدتك وطفولتك، لا، بدينا نفهم نواحي كثيرة من شخصيّة سعيد عقل إلّي ربّما تكون غامضة بالنسبة للكثيرين من الناس دلوقت، حبّك بالنسبة لحبّك باللاهوت وشغفك فيه، بـ اورّيك إلى حدٍّ ما، بـ تورّي ايه؟ أنت هنا مع الستّ مي مرّ الشاعرة ومع مجموعة من الآباء؟ (00:13:45)

ج ـ هذا اليوم صار مطران بيروت، مطران بيروت للكاثوليك هو إله فضل على النهضة الإجتماعيّة في لبنان، هو مطران بيروت للكاثوليك. هـ الصورة ما كانش بعده مطران بيروت، كان بعده المطران طيّب وكان معاون مطران، ثمّ الشاعرة مي مرّ، زوجها المهندس ألفرد مرّ والبقوة رهبان، مأكّد كنّا بنهار عمّ يعمّدوا ابنهم وكنت أنا عرّاب ابنهم. المهندس مرّ وزوجته الشاعرة أصدقائي كثير.

حديث مع السيدة مي المرّ عن الأستاذ سعيد عقل (00:14:49)
(خمس دقائق وثلاثة وعشرون ثانية)

س ـ ستّ ميّ بـ تكتب عنّك كتاب دلوقت، بـ تلخّص فيه حياتك وشخصيّتك، فرحت تكلّمت معاها شوي، مَن هو سعيد عقل؟ هل تعرّفنا بسعيد عقل؟ فأجابتني بصراحتها المعروفة. (00:15:04)

س ـ ستّ ميّ مرّ، أنتِ معروف إنّكِ من تلاميذ الأستاذ سعيد عقل، تلاميذ في العمر أوّلاً وفي المبدأ ثانياً وفي الأدب ربّما ثالثاً، وهو شخصيّة متعدّدة الشخصيّات ولذا عايزاكِ توصفيلي هذه الشخصيّات المتعدّدة كتلميذة ترى أستاذها مين هو السياسي ومين هو الأديب ومين هو الخطيب بشخصيته؟ بدأ من السياسة؟ والاّ الخطابة؟ والاّ الأدب؟ (00:15:34)

ج ـ بالفعل مثل ما قلتي ستّ ليلى، نحن أنا وفريدي اثنيننا من مدرسة سعيد عقل الفكريّة بكلّ معنى الكلمة. لمّا مـ نقول الفكريّة مـ نعني كلّ نواحي التفكير، إن كان من ناحية الأدب أو السياسة أو كلّ الباقي. ومثل ما تفضّلتي وقلتي كمان سعيد عقل متعدّد الشخصيّات يعني من الأشخاص إلّي قليل كثير ما يلتقى منهم بالعالم. بدأ حياته بالسياسة وهذا شيء غريب لأديب معروف قدّ سعيد عقل بالأدب.

س ـ بـ تعرفيه بقالك قدّ إيه ستّ ميّ؟ (00:16:13)

ج ـ نحن مـ نعرفه من 11 أو 12 سنة.

س ـ إذن مش من أوّل حياته تمام؟(00:16:19)

ج ـ طبعاً، ما رافقته من أوّل حياته، أوّلاً في فرق بالعمر كبير، ما تعرّفت عليه من زمان، إنّما أنا بـ اعرف إنّ لمّا كان عمري 16 بالمدرسة أخذت جايزة قدموس، يعني كنت أعرف كثير من أشعاره قبل ما اتعرّف عليه شخصيّاً. لمّا بـ اقول بـ اعرفه شخصيّاً يعني من 11 سنة تعرّفنا عليه عن قريب.

س ـ طيّب إيه إلّي خلاّكِ حضرتك والأستاذ ألفرد مرّ زوجك تلتقوا هذا اللّقاء والإلتحام الفكري والمبدئي والإيديولوجي من 11 سنة بالذّات؟ إيه الظّروف إلّي جمعتكم؟ (00:16:47)

ج- الظّروف إنّه أنا كنت أدرّس بالجامعة اللبنانيّة وبدار المعلّمين، والأستاذ سعيد كان يدرّس هناك كمان وكنّا نلتقي وصدفت الظّروف كمان إنّ أنا كنت كاتبة شعر وبـ تعرفي إنّ سعيد عقل هو إلّي بـ يعطي وبـ يدفش الناس إذا أمكن القول كثير، وحبّيت إنّ آخذ رأيه بهـ الشعر. شاف هـ الديوان الشعر سنة 58 أو 59 وأعجبه كثير ومن وقتها صار في نوع من صحبة بيننا وهـ الصحبة صارت تتحوّل شوي وشوي إلى شغل سوا إلى حرب إذا أمكن القول عقائدي، حرب في سبيل القضايا الأخلاقيّة، القضايا الوطنيّة، القضايا الفكريّة وهيك.

س- طيّب إذا لخّصنا إيديولوجيّة سعيد عقل في جملتين ثلاثة بما أنّك من روّاده والناس مؤمنين بيه، إيه هي إيديولوجيّة سعيد عقل بالضبط؟ أنا عارفة إنّ السؤال صعب لأنه هو بـ يحتاج إلى يمكن كتب، لكن كطالبة ورائدة ومارقة بحياته، بقالك 11 سنة عن قرب بـ تقدري تلخصيلي سعيد عقل لأنه احترنا فيه شوي. (00:17:51)

ج ـ لا راح الخّصلك إيّاه ما بـ احتار أنا بـ الخّصه بجملة واحدة: سعيد عقل بـ يتلخّص بهـ الجملة: "احبّ كلّ الناس وعمال إلّي بدّك إيّاه"، هيذي الجملة بالفعل بـ يقولها القدّيس أوغوستينوس القرطاجي، بـ يخصّنا يعني، بـ يقول: "حبّ كلّ الناس وعمال إلّي بدّك إيّاه" حبّ كلّ الناس بمعنى إنّه ما بـ تترك ولا إنسان خارج محبتك، لا من إلّي راحوا ولا من إلّي موجودين ولا من إلّي راح يجوا، ومتى كنت فعلاً تحبّ الناس صار فيك إنّك تعلّمهم وين الأشياء الصالحة ووين صالحهم حتّى لو جيت ضدّ آراؤهم وضدّ أفكارهم إلّي هنّ مؤمنين فيها أكثر شي، بس بـ يشعروك إنّك بـ تحبّهم لدرجة إنّه بـ يعملولك إلّي بـ تريده أخيراً لأنهم يؤمنون إنّك منشان صالحهم عم تشتغل. وطبعاً هـ الفكرة هيذي مستقاة عند سعيد عقل من إيمانه بالله. بـ تعرفي إنّه سعيد عقل مؤمن كثير كثير بألله، يعني "ألله" يخترق كلّ هنيهة من هنيهات حياته، كلّ كلمة من كتاباته، نحن بهـ الكتاب إلّي يمكن يطلع 1000 إلى 1500 صفحة عند سعيد عقل منحطّ قمّة الهرم الفكري عند سعيد عقل اللاهوتيّ يعني رجل الله. هـ الشخص إلّي بـ يحبّ كلّ الناس لذلك بـ تلاحظيه حتّى الناس إلّي ما بآمنوا إيمانه، سعيد عقل متديّن غير متطيّف يعني عنده إنّه لبنان مثلاً طايفة واحدة هو طايفة اللبنانيّين ومش ممكن يفرّق بين مسيحي ومسلم وقضايا من هيك نوع لأنه بـ يعتبر إنّ في فئتين صحيح بالبلاد بس في فئة الأوادم وفي فئة الخلاّقين وفي فئة الناس المعتّرين المرتّين إلّي بدّك تخلّصهم من جهلهم ومن تعتيرهم. إذن ما ممكن إنّه يفرّق ويكون طائفي، إذن هون المحبّة عنده إنّك تحبّ كلّ إنسان حتّى لو كان على خطأ بـ تبغضله خطأه وضلاله وما بـ تبغضه هو. بهيك يُلخَّص سعيد عقل بكامله.

إيديولوجية سعيد عقل (00:20:12)
(خمس دقائق وثلاثة وثلاثون ثانية)

س ـ أستاذ سعيد عقل، هـ التلخيص ما اعرفش إذا كنت راضي عنه أو بـ تحبّ تضيف إليه شيء، لكن أنا شخصيّاً بـ اعرف عنّك كسياسي إنّك معروف إنّك Eutopien، يعني مثالي. السياسة ما فيهاش مثاليّة. ازاي بقى تكون رجل الله ورجل مثالي وفي الوقت نفسه لك إيديولوجيّات سياسيّة؟(00:20:39)

ج ـ أنا بـ احتجّ على كلمة مثالي. عندنا بالجرد بياخذوا كلمة مثالي بالمعنى إنّه كلمة خيالي مرّات بمعنى إنّه فشّاط وما بدّه يعمل شي. إذا كانت مثالي بالمعنى إلّي وُضِعَت لأفلاطون هو أوّل مين انقالت عنه وهو جاب المُثُل، أنا فخور بأنّي كون مثالي. وإن أخذوها بمعنى خيالي يعني إنّ الإنسان لازم يتخيّل ويشوف الأشياء الكبيرة، كمان أنا أفاخر.

صديقي جوفيو دي كاسترو، السياسي البرازيلي الشهير وإلّي اخترع إنّه الجوع مرض وعم بحاول يشفيه من هـ الأرض، بقول: "اعطيني سياسيّين بيعرفوا يتخيّلوا وأنا بخلّص كلّ مشاكل الأرض". يعني معتبر إنّه قلّة التخيّل بالسياسة هو أكبر مصيبة من المصايب وأنا هيك بقول وعندي خماسيّة بهـ الموضوع بحبّ أذكرلك إيّاها وسمّعها لشعبي، هـ الخماسيّة بتشدّد على إنّي أنا بريد كون هـ الّي بـ يشوف كبير وبذكر إنّي كتبتها بوحي من تأثير كلمة قلّي إيّاها صديقي فؤاد البستاني، هذا صديقي من عمر، هو رئيس الجامعة اللبنانيّة اليوم وإلّي عم يصدّر هـ الإنسيكلوبيديا اللبنانيّة الشهيرة. قلّي: "أنت كنت عم ترسم بلادك بخيالك وعم ترسمها كبير واليوم عم شوفك عم بتنفّذ". مثلاً كنّا نحكي عن إنّه لازم نعمل جوايز بلبنان، كان يومتها وهم هـ الأمر، ولمّا شافني نفّذت تأثّر، وهو من حَمَلة جايزتي كمان. بعدين كلّ ما نفكّر إنّ نغيّر اللغة ونغيّر الحرف شافني صدّرت كتب وغيّرت يعني مش ضلّيت مثل عندكم بمصر عم يحلموا بتغيير اللغة وتغيير الحرف مثل عثمان صبري وعبد العزيز باشا فهمي، الله يرحمه، حلموا بهـ الأمر وكتبوا إنّه لازم يصير ولكن ما نفّذوا، أنا نفّذت. قال لي: "سعيد، أنت بتحلم وبتنفّذ". وبالفعل كانت هـ..

مؤلفات سعيد عقل: الشعر الخماسي والشعر المسرحي (00:23:13)
(ثلاث دقائق وثانية واحدة)

س ـ هـ الخماسيّة أستاذ سعيد. (00:23:13)

ج ـ كانت هـ الخماسيّة بقول:

يا شَغَلني (هـ الختوم لفكرة التّخيّل)

يا شَغَلني غيرَ نظر الخيال

كَمَن لا، ولا عبقريّ الغدِ

أبيتُ، أنا قُبلةُ الموعدِ

سَكَنتُ بلاديَ صُنعَ المحال

سأسكنها بعدْ صنعَ يدي

س ـ هـ الخماسيّة هـ الطريقة يعني بالبحر، من إختراعك؟ القفلة الجديدة؟ (00:23:49)

ج ـ الخماسيّة بالحقيقة مش معروف إنّه بالعالم بالشعر في خماسيّات، في رباعيّات منها الشهيرة رباعيّات الخيّام وترجمتها الشهيرة بإنكلترا وفي الثلاثيّات عند "دانتي"وفي ثنائيّات بكلّ الشعر الإلكسندراني الفرنساوي وفي سداسيّات، إنّما خماسيّات ما شفت، ولمّا طلع معي هـ الديوان الجديد إلّي عم بـ اكتبه بشكل خماسيّة، لاحظت إنّه بـ يقدر يعطي الواحد فيه أكثر من الرباعيّة لأنّه هـ البيت الخامس إلّي بيقفل بيعمل قفلة قويّة كثير، وكثير أنا بحبّ الخماسيّة اليوم.

س ـ ممكن نسمع مرّة بعد؟ (00:24:30)

ج ـ يشاؤونني غير نظر الخيال

كمَن لا، ولا عبقريّ الغدِ

أبيتُ أنا قُبلةُ الموعدِ

سكنتُ بلاديَ صُنعَ المحال

سأسكنُها بعدْ صُنعَ يدي

س ـ حضرتك كأديب كتبت السرحيّة الشعريّة؟ (00:24:59)

ج ـ قدموس

س ـ قدموس وقبلها في مسرحيّة، ولم تعد تكتب المسرحيّات الشعريّة أبداً مع أنّه الأدب العربي يفتقر بالذات إلى المسرحيّات الشعريّة، لكن إيه السبب ما كتبت مسرحيّة شعريّة؟ (00:25:07)

ج ـ صحيح هـ السؤال كثير بحبّه، بصارحك إنّه ضامر أكتب عدد من المرسحيّات عديدة. بهـ المناسبة بـ قلّك ما بـ احبّ كلمة مسرحيّة، بحبّ كلمة مرسحيّة في تخليط لكلمة مرسحيّة على مسرحيّة. أخذوا كلمة سَرَحَ، خمّنوا بحيث الأشخاص بيمشوا على الملعب بيسرحوا، مش مضبوط. بالحقيقة مرسح مأخوذة من ساحة كبيرة كانوا يسمّوها المرسح وتخمين انلعب أوّل مرّة على هـ الساحة وتسمّى كلمة مرسح، إجا شي واحد متحذلق باللغة ما لقى فعل رَسَحَ لقى فعل سَرَحَ وسمّى المرسحيّة المسرحيّة. لا أنا ما بـ احبّها هـ الكلمة بكل كتاباتي ولا مرّة كتبت مسرحيّة، على كلّ حال هذا شي ثانوي.

المرسح بـ احلم إن إرجع ليه وضامر إنّي أعملّي شي 30 مرسحيّة كلّهم بـ يمثّلوا قيمنا وتاريخنا وكتاب لي "لبنان إن حكى" بـ يعطي فكرة عن قدّيش متقمّش أنا من تاريخنا ومن هنيهاته العظيمة، هوذي كلّهم بدّي حطّهم بمرسحيّات. مستقبلي إنّي أعمل شعر مرسحي كبير مثل ما أنا بـ احلم. إن شاء اللّه يعطيني هيك.

س ـ لكن 30 مرسحيّة بفرد مرّة؟ (00:26:52)

ج ـ هـ القدّ بـ احلم اي، عامل مخطّط لشي من هذا، أوّل مرّة بـ اذكرلك هـ الأمر، إنّما أصدقائي الحميمين بـ يعرفوا هـ الحقيقة.

س ـ طيّب أرجو إن شاء الله قريباً نشوف ده لأن فعلا الأدب العربي محتاج. أنا حـ اقول مسرحيّة مش مرسحيّة عشان مش متعوّدة. (00:27:03)

ج ـ إن شاء الله بـ تتعوّدي عليها.

س ـ أنا بقى حـ أتناول شعرك بقى، مش شعرك المسرحي او المرسحي وإنّما شعر سعيد عقل يُقال الكثير فيه، له روّاد وفي له نقّاد ولذا أنا ما اقدرش أتناوله ما بـ افهموش ولازم افهمه. أيّ إنسان يلتمس الشعر، يحتاج إلى وقت طويل حتّى يفهمه رغم روعة الكلمات حـ ناخد متل هذه الأبيات في رثاء خليل مطران:

ما الموت شمخة رأس منك

واسلم بباقة شعر عطرها الأبد

مهابة الأرز بنت الفارسي أنا

نبكيك، فلتتغاوى الستّة العمُد

ومن ترى قال ليس سبعة؟

انا، انا ذا عيني اليك، أفلا يكمل العدد؟

طبعاً ما اعرفش أقولها زيّك ولكن عايزين نسأل مثلاً "ما الموت شمخة رأس منك"، "شمخة رأس منك" العلاقة بين "شمخة" و"رأس".... (00:29:02)

ج- معلوم، لا يمكن يطلع عندي اضافة مذكر لمذكر، ما ممكن يطلع معي إلاّ "شمخة رأس". لو قلت وقع جبين مثلاً كان الوزن بـ يستقيم لكن وقع مذكّر وجبين مذكّر هذا بـ يزعجني، بـ احسّ ذَكَر وذَكَر عم يرقصوا او انثى وأنثى عم يرقصوا، ما بـ اطيقها هيذي هـ الشعور، أنا رجّال منظَّم بعقلي وإبن الطبيعة وإبن الخلقيّة.

س ـ أنا بـ احبّ الشرح على العموم لأنّه مهضوم كثير، الشرح مهضوم. طيّب بـ توصف دلوقت خليل مطران بهذه الكلمات ودائماً أبياتك بـ تتقطّع كده بـ تقطّعها، مهابة الأرز، بنت الفارسي. إذا ما كانش الواحد عارف إنّ خليل مطران عنده قصيدة إسمها بنت الفارسي.... (00:29:34)

ج ـ مش بنت الفارسي بزرجمهر بنته لبزرجمهر لعبت هـ الدور الحلو.

س ـ مين حـ يعرف الواحد مين بنت الفارسي؟ بدّها شرح Explication de Text(00:29:59)

ج ـ نعم نعم

س ـ دا شعر للمناسبة بس ولا شعر مفروض للجماهير؟ (00:30:06)

ج ـ حبيبتي، في شعر لازم يعرف الواحد إنّ قارىء الشعر ذو مستوى مش مثل قارىء الجريدة والخبر اليومي. أنتِ عمّ تنتقدي الصعوبة عندي، بـ اذكّرك بالجرجاني شو قال عند العرب؟ قال "إنّ الشّعر الفاخر هو بـ يماطلك قبل ما يمكّنك من نفسه". كمان عندكم أنتوا النّساء بـ تعرفوها هـ الحقيقة لمّا الواحد بـ يروح يزور بنت ليتزوّجها مش بـ تزتّ حالها عليه بفرد جلسة، بـ تماطله قبل ما تستقبله وتقلّه اي، فالشعر فيه شيء من هذا وأنا فخور إنّ شعري ما بـ يسلّم حاله مثل بنت الرصيف أوّل ما يطلّ، لهذا السّبب بـ يرجع ينقرا مرّة وعشرة وعشرات المرّات، الشعر العالي دائماً فيه شيء من الصعوبة هذا شيء حقّ محتوم.

س ـ أنا نبكيك، بدّي تشرحلي إيّاها لغوياً، أنا قلت أنا، قلت إنّا نبكيك قلت أنا أبكيك بعدين بـ يقولولي لا، أنا. ازّاي؟ (00:31:08)

ج ـ معلوم، مهابة الأرز، ثلاثة عمّ نبكيك: مهابة الأرز، بنت الفارسي، أنا، نبكيك، ثلاثتنا. وهون "أنا" فيها كريشندو ((crescendo، حطّها بعد مهابة الأرز وبعد قصيدته الشهيرة بنت الفارسي، حطّ حاله فوقهم اثنيناتهم وقال له: "وحتّى أنا نبكيك، فلتتغاوى الستَّة العُمُدُ".

س ـ "أنا" يعني سعيد عقل؟ (00:31:49)

ج ـ آ طبعاً، وبتعودي تتساءلي ان كنّه هـ المديح لخليل مطران أو في شي كمان من زهوّ الشاعر حتّى "أنا نبكيك فلتتغاوى السّتّة العُمُدُ"

س ـ السّتّة العُمُدُ دول في بعلبك؟ (00:32:04)

ج ـ يعني بعلبك رمز بعلبك ورمز أعظم بناء في الدّنيا.

س ـ آ بقى الستّة العُمُدُ يعني لو الواحد ما رحش بعلبك ومش عارف إنّ بعلبك فيها ستّة عواميد، ما بيفهم مين الستّة العُمُدُ؟ (00:32:12)

ج ـ صحيح لكن ساعتها إلي ثقة أنا إنّ بعلبك إذا ما كناش قدرنا نصيّرها مشهورة بالدّنيا، يمكن هي مصيّرة بالدّنيا، وإلّي ما بيعرف إنّ في بعلبك والستّة العُمُدُ، ما بدّي أبداً يقراني ولا يُعجَب بشعري، هذا بـ يكون أُمّي، أُمّي الثقافة وأُمّي المجد.

س ـ بس أستاذ سعيد عقل لازم بردو تجعل من شعرك قُِبلة للجميع حتّى المبتدىء في الشعر ما تتعالى كثير على القارىء (00:32:37).

ج ـ لا انا ما بـ اتعالى حبيبتي على القارىء، إنّما في ذهاب غلَط. بـ اقول الإنسان العادي بـ يتصوّر إنّه، هو بيقرا خبر اليوم، وقعت طيّارة وبيفهمه وبيتصوّر إنّه إذا قرأ قصيدة لازم يفهمها بذات السهولة إلّي فهم فيها هـ الخبر "لا"، ما في فنّ حبيبتي هيك خبريّة: "قلبي بيوجعني" بالاغنية ما بتواجهيها وبتتلذّذي فيها مثل السمفونيّة الخامسة لـ "بتهوفن".السمفونيّة الخامسة بدّك تكوني على شيء من الثقافة مهما تطلّبت منها بدّك تكوني على شيء من الثقافة. ما بقبل أبداً ينقرا الشعر وينطلب منه هـ العطاء المباشر السطحي إلّي بتعطيه الخبريّة البسيطة، كون الشعر إله اللغة ذاتها تبع الإخبار العادي بيوهم القارىء إنّه لازم يفهمه مثل ما بيفهم الخبريّة العاديّة. لا، هذا لازم تشيلوه من راسكم. الشعر أكبر من هيك وخصوصاً الشعر إلّي إله مستوى، هذا إلّي بيحفظوه النّاس منه الغَزَل عندي. أنا في كتاب للدكتور جوزف صايغ عنّي، اسمه "سعيد عقل وأشياء الجمال"، بياخذ غَزَلي بديوان "رندَلى" وبـ يشوف وراه كلّ سياستي مع إنّ الديوان لأوّل وهلة بـ تقريه ديوان غَزَل وفي بنات كثار بـ يعرفوه غيباً، بيعرفوا منه مقاطع كثيرة غيباً، إنّما وراؤه كلّ إجتماعيّاتي وكلّ فلسفتي السياسيّة وكلّ لاهوتي. هذا كلّه ما ممكن يعطيك حاله بهـ الشكل المباشر أبداً.

س ـ بس الغَزَل عندك أسهل شوي بـ افهمه بسرعة. (00:34:36)

ج ـ بـ تفهمي القسم الغَزَلي صحيح بـ تفهمي القسم الغَزَلي، أمّا القسم الفلسفي والسياسي بدّك تتعوّدي عليه، لكن إلّي تعوّدوا عليه بـ يعملوا عجايب معه.

س ـ بعد ما تكلّمت عن "الستة العُمُد"ُ بـ تكمّل وبتقول ودول بيتين حلوين: ومَن ترى قالت ليست سبعة؟ ليه ما يبقوش سبعة؟ ليه؟ ليه: " أنا (encore une fois) أنا الشاعر أنا ذا عيني إليك أفلا يكمل العدد". يعني: أنا عشان حطيت عيني عليك يا مطران، بقوا السبعة. شوف في كم أنا أنا أنا هذا زهو الشاعر بنفسه؟ (00:34:52)

ج ـ صحيح، صحيح، القصيدة فيها autobiographie كمان وهـ القصيدة بـ تمثّلني كثير. خليل مطران كنت بـ احبّه وأعجب فيه ويمكن بين الشعراء القلال القلال إلّي بـ اعجب فيهم بهـ المستوى، أنا كنت بـ اعتبر حياته كلّها قصيدة، فإنّي أنا وعم بـ ارثيه حطّيت كلّ زهوي. أنا فخور إنّ هـ الرجل إلّي اعتبرته مش دواوينه هي القصيدة العظمى تبعه، حياة خليل مطران هي الشيء العظيم، هي القصيدة الكبرى، فإنّي دخّلت حياتي وزهوها. ليكي حبيبتي لازم تفرّقي بين الزهو والكبريا، أنا مش متكبّر، أنا عندي زهو أنا عندي نبل مش حقير، لكن مش متكبّر. بهـ القصيدة فيها زهو ما فيها كبريا، فرق كبير بين الزهو والكبريا.

اهتمام سعيد عقل بالكتابة العامية والترويج لها – اللغة اللبنانية (00:36:21)
(اربع عشرة دقيقة و ثانية واحدة)

س ـ مبارح بالليل قعدت اقرالك شويّة شعر، كثير سهرت مع شعرك مبارح وبعدين لقيت حاجات كثير صعبة قوي بعدين استغربت، قلت الأستاذ سعيد عقل بـ يكتب عربي فصيح وانتقاؤه للكلمات زي حضرتك ما قلت مش عايز إنّ الواحد يجيلك ببساطة أو يوصلّك ببساطة، تقيل جدا،ً الزهو دا باين حتّى في الشعر إنّ أنا بـ اعرف لغة عربية أنا بـ انقّي كلماتي أمّال ازّاي بـ تطالب بعد معرفتك باللغة العربية تطالب بالكتابة بالعاميّة؟(00:36:21)

ج ـ آ، هيذي قضيّة كبيرة فتحتيها. هيذي إذا عرفها شعوب هـ الشرق يمكن بـ يدفشوا حالهم شي 200 سنة. أنا عم بـ اعمل ثورة باللغة وثورة بالحرف هوذي ثورتين سوا. والحرف واللغة بـ يفرقوا عن بعضهم مش مثل ما بـ يخمّنوا إلّي مش إختصاصيّين. الحرف بـ يفرق عن اللغة مثل ما ثوبك هذا بـ يفرق عن جسمك. الـ Bios شي والثوب شي. الثوب وجده الإنسان لهذا السبب ساعة إلّي بدّه بزتّه وبـ يجيب بدله. نحن إلنا سيطرة على الثوب ميّة بالميّة، أمّا جسمنا ما إلنا سيطرة عليه. نحن خلقنا إلنا قلب وإلنا زلعوم وإلنا عينين، ما فينا نغيّر قلبنا وزلعومنا وعينينا. الحرف تـ بلّشلك بثورة الحرف، الحرف ليش بدّي غيّره وليش بدّي غيّره على أساس الحرف اللاتيني، لأني عملت الحرف اللبناني على أساس الحرف اللاتيني، كنت قادر أعمله على أساس الحرف العربي أو الحرف اليوناني أو الحرف الروسي أو الحرف السانسكريتي، في شي 80 حرف بالدنيا بـ يسوى إننا نعملهم. الحرف في الدنيا كلّها بـ يقول العاِلم موريس دونان مكتشف جبيل وردّدها من بعده وأذاعها بالدنيا كلّها الدكتور فيليب حتّي، المؤرّخ الشهير. الحرف بالعالم كلّه يعني أي ألف باء بالدنيا بس تكون ألف باء لمّا ما بـ تكون ألف باء مثل الهيروغليفيّة بمصر أو مثل الكتابة الصينيّة هوذي مش ألف باءات، هوذي نوع آخر من النوع التصويري ما كانت خلقت الألف باء، وبعده باقي بهـ الأرض بس بالصين وبالعالم الصيني. الحرف وقت إلّي بـ يكون ألف بائي كلّه بالأرض ابن ألف باء جبيل بـ يقولولكم ابن ألف باء الفينيقيّة، لأ، مش حيّـالله ألف باء فينيقيّة لأنه فينيقيا عطت عدّة ألف باءات إنّما كلّهم خلّفوا إلّي خلّفت هي ألف باء جبيل، ولو عندي لوح هلّق كنت كتبتلّك ألف باء جبيل الفينيقيّة وبـ سلسلّك منها كلّ الألف باءات إلّي بـ تعرفيهم، منها الألف باء العربيّة ومنها الألف باء اللاتينيّة ومؤكّد بـ تعرفي شويّة يوناني، بـ احطلّك الألف باء اليونانيّة كيف تسلسلت هـ الألف باءات هوذي كنت قادر آخذ منها أنا شي ألف باء وصنّعها لأنّه كلّهم خربطوا على الأصول، شو الأصول؟ مش صعبة تعرفي الأصول. كلّ صوت لازمله حرف وكلّ سند للصوت بـ يسمّوه Voyelle لازمله حرف مش لازمله علامة صغيرة مثل فتحة كسرة هاتي نحطّها هاتي ما نحطّها، لا، لازمله حرف هالـ Voyelle لازم تكون حرف قدّ الـConsonne بس يزوغلوا الألف باءات بهـ الأمر بـ يجنّ المصلح إلّي بـ يعرف ليش وجدت الألف باء الفينيقيّة العظيمة. فجيت أنا قلت بدنا نصلّح شي ألف باء من هـ الألف باءات وكلّهم بـ يقربونا ذات القربة ما عندي Complexe d’inferiorité، أنا ما عندي عقدة صغر تجاه اي حرف من الحروف، لأنّي كعالِم بالألف باءات بـ اعرفهم إنّهم كلّهم ولاد ألف باء جبيل، فإذن بـ تقربني الألف باء العربية قدّ ما بـ تقربني الألف باء اللاّتينيّة قدّ ما بـ تقربني الألف باء السانسكريتيّة. ليش أخذت الألف باء اللاتينيّة وأجريت الإصلاح عليها قلتلّك كنت بـ اقدر بـ اجري الإصلاح على حيّـالله ألف باء من اولادنا بس مش لأنّها أحسن بس لأنّها مصهورة بالدنيا، قلت لحقت وصلّحت ألف باء خلّيني صلّح الألف باء إلّي هي اليوم عالميّة لأنّه كلّ واحد بالعالم بـ يعرف ألف باء بلاده وبـ يعرف الألف باء اللاتينيّة، ما بـ يعرف ألف باء بلاده وبـ يعرف ألف باء العرب مثلاً، جيت صلّحت الألف باء اللاتينيّة هي مشاكلها طويلة عريضة مثل غيرها، إنّما بحيثها عالميّة صلّحتها، هي الثورة الأولى، ومن هون قال صديقي الشيخ عبد الله العلايلي إنّ ثورة سعيد عقل في الحرف، أنا بـ أؤيّدها ميّة بالميّة، هي مش ثورة بس على الألف باء العربيّة هي ثورة على كلّ ألف باءات العالم وهـ الثورة لازم تتطبّق بالدنيا كلّها. أنا بـ اطمح إنّهم يكتبوا بالإنجليزي الإنجليزيّي بهـ الألف باء والفرنساويّي بهـ الألف باء مش بس اللغات تبعنا بهـ الألف باء، هيذي الثورة الأولى. صيّرت الحرف مثل الرقم، بالرقم بـ تقبلي 7 تنفهم مرّة 7 ومرّة 8؟ الحرف بالعربي وبالإنجليزي خصوصاً بـ تكوني عاملتيلها شي بـ ينفهم منه شي ثاني، هذا لو سمعك الفينيقي إلّي عمل الحروف، بـ يقبّ راسه عليك. مثلاً خذي الـ X بالفرنساوي بـ "Alexandre" هي "كسا" مثل ما علّموكي ياها بـ" Example" صارت "كزا"، بـ "Bruxelle" صارت 2 "إس"، بـ "Dix" "اس"، بـ "Perprix" صارت ما شي، بـ "Dixieme" صارت "ز". خذي الألف بالعربي بـ"ضاربوا" إذا ما قريتي ضاربوا الألف، بـ يقوم عليكِ معلّم اللغة، لكن كمان بـ يقلّك ضاربوا، بـ تقليله والألف بالآخر بدّك اقراها؟ بـ يقلّك: لا، الألف بالآخر ما تقريها والألف إلّي بعد الضاد قريها. هذا ما بـ يصير لازم يصير عندك حرف بس ينوجد تقريه وما ينوجد ما تقريه.

صلّحت هـ الأمر وجعلت الحرف مثل الرقم، الرّقم والحرف بالنبع واحد كلّهم من الألف باء الفينيقيّة تبع جبيل، صيّرت الحرف ينقرا كلّه. مثلاً خذي مثلاً Shakespeare 8 حروف باللبناني بالإنكليزي 11 حرف.

س ـ هلّق بدّي افهم هيذي سمّيتها اللغة اللبنانيّة؟ (00:42:05)

ج ـ الحرف اللبناني بعد ما حكينا عن اللغة عم بـ احكيلك عن الفستان هلّق مش عن الجسم هذا عن الحرف. هذا الـ "ش" باللبناني هذا الـ"اي" في عندي "اي" وفي عندي "او" Shakespeare هذا "اي" وهذا "ك" وهذا "س" ولا مرّة هيذي بتعمل "Z" لأنه ألها حرف الـ "Z" ليش هيذي مرّات بتعمل "Z" وهيذي "P" وهيذي "E" و"E" وهيذي "R" شِكْسْپِير ما عدتي تقريها إلاّ شِكْسْپِير بينما Shakespeare لمّا بتنكتب بأوروبا بيقروها الإسبانيول شكسبيار وصار اسمه عندهم شكسبيار. بخبّروكي إذا قلت شِكْسْپِير إنّك غلطانة بالعربي بتقريها شَكسَبير مثلاً. عند بولس سلامة حاطتها بشعره شَكسَبير فيكِ تقريها شَكسَبَير شُكسَبير، أما عندي ما في ولدنة، بـ تقريها مثل ما لفظها هو وآن الأوان بقى لنصيّر الحرف يعطي هيك.

س ـ هيذي تشبيه الحرف بالرقم كثير Intéressent ، لكن بـ تصير هلّق حرف دولي مش حرف لبناني؟ (00:44:08)

ج ـ هذا لازم يطمح يصير حرف عالمي، إنّما هلّق نحن عم نطبع 14 ألف نسخة من هـ الكتب، يعني أكثر من ما مـ نطبع بالعربي. الكاتب الكبير بـ يطبع 3 آلاف بالعربي نحن عم نطبع 14 ألف من هـ الكتب هيذي إلّي بين إيدينا وصار طالع منها أفلاطون كتابان بالفلسفة وشكسبير الشاعر العظيم.

س ـ في ناس بـ تشتري الكتب دي أستاذ سعيد؟ (00:44:38)

ج ـ تلاميذ المدارس عندنا 14 ألف زبون لهـ الكتب ونحن مـ نطمع إنّ بعد شي سنتين ثلاثة بـ يصيروا شي 50 ألف.

س ـ طبعاً بدّه الواحد يدرس الألف باء من أوّل وجديد. (00:44:51)

ج ـ بـ يدرسها هـ الكتب هيذي بـ تقدري تتعلّمي دراستهم بخمس دقائق، نحن مـ نزتّّهم من الصفّ الخامس للفلسفة بين إيدين التلاميذ رأساً.

س ـ ده بـ تسمّيه الحرف اللبناني؟ (00:45:03)

ج ـ بسمّيه الحرف اللبناني مش اللاتيني، لأنّه اللاتيني بعد في شويّة زعبرة، لغيناله الزعبرة للاّتيني، صار الحرف اللبناني مثلاً هيذي هالـ "X" هيذي "ح" عندنا دائماً "ح" مش 6 قيم إلها مثل بالفرنساوي دائماً "ح" اشترطنا عليها: أنتِ "ح"، خلص صارت "ح" وما عاد في غيرها بـ يعطي "ح".

س ـ لكن الحرف شيء زي ما قلنا واللغة والفستان شيء ثاني؟ (00:45:29)

ج ـ آ مشكلة اللغة أهمّ، ثورة الحرف حبيبتي، ثورة الحرف بتشكّل شي 5% من ثورتي، أمّا ثورة اللغة أهمّ بتشكّل 95%. شو ثورة اللغة؟ شرحها طويل بس راح حاول قلّك إيّاها بكم كلمة وقلّك شو تأثيرها على مستقبلنا لأنّي مرّات وقت إلّي بـ اقلّهم إنّ إذا عملنا ثورة اللغة مـ نغلب إسرائيل بـ يضحكوا السطحيّين. لا، أنا واثق عم بـ اعرف شو عم بـ اعمل، صار مرّتين هـ الثورة إلّي عمّ بـ اعملها بالتاريخ، أوروبا وقت إلّي تركت اللغة اللاتينيّة بالأرض وأخذت اللهجات المتعدّدة وصيّرتها لغات، اسمها اليوم الفرنساوي الطلياني الإنكليزي الألماني، وقت إلّي روسيا على عهد ستالين تركت الـ لغة ما عادت محكيّة (هذا تحديد اللغة الميتة)، تركت الـ 18 لغة ما عادت محكيّة وأخذت 127 لغة كانوا محكيّين الـ Criterion تبع اللغة تـ تفعل وتزدلك عقلك وتخلّي عقلك ينتج وياخذ، لازم تكون محكيّة، لهذا السّبب عثمان صبري بمصر اليوم قاضي كبير هذا عنده مؤلّفات عم بطالب باللغة الحيّة مثل ما عم بطالب بالحرف اللاتيني، يعني ذات الثورة إلّي عم بعملها أنا عم بحاول يعملها، إنّما ضعفه هو مش عم بنفّذ، السّنة لنفّذ، طيلع كتاب باللغة المصريّة اسمه "رحلة في النيل" عملّه مقدّمة بالمصري هـ المرّة. اللغة حبيبتي بتقول هيك. كلّ ألف سنة اللّغة بصير عندها مشكلة بدّك تصلّحيها، اللغة هي وعم تمشي بهـ الوجود بـ تصير تختصر، بدّك تاخذيها بآخر أشكالها تـ يكون عندك أحدث نوع وأحدث شي بيعطي وبيتّاخذ فيه. مثلاً خذي "حان لنا أن نضرب" حان لنا أن نضرب"، 8 مقاطع بدّهم 8 تكّات تـ ينلفظوا، "حلّنا نضرب"، أربع مقاطع، يعني درس بالجامعة من 80 ساعة بالفصحى بـ تعمليه بـ 35 ساعة باللبناني وهيك بأوروبّا. يعني درس بلغة شكسبير الإنكليزيّة يعني لغة القرن السادس عشر بدّه 80 ساعة، بدّه 30 ساعة باللغة الإنكليزيّة الحديثة ما حدا بـ يفكّر بإنكلترا إنّه يكتب بلغة شكسبير مع إنه ما عندهم كلّ يوم مثل شكسبير، ما بـ يكتبوا بلغة شكسبير. نحن بالشرق بدنا نكتب مثل امرؤ القيس مع انه شو بـ يجيب امرؤ القيس لشكسبير وبدنا نكتب مثله. قضيّة اللغة أخطر شي، وإذا الشرق يعني آسيا وأفريقيا كلّهم ما أخذوا كلّ واحد لغته المحكيّة بـ يخرب بيته، بدّهم يخلّوا عقلهم يصير فعلاً العقل إلّي بإيده أحسن وسيلة، لازم كلّ البلاد تاخذ لغتها الحيّة المحكيّة.

س ـ إذن بـ يصفّي الفستان إذا قارننا اللّغة بالجسم والحرف باللباس، هـ الجسم لازم يتطوّر مع الزمن؟ (00:48:52)

ج ـ نعم، بدنا ناخذ آخر تطوّره. أنتِ بـ تعرفي إنّ الجسم كان يدبدب في التاريخ الماضي.

س ـ هذا هو (00:49:13)

ج ـ ما بـ يسوى ناخذ الجسم لمّا كان يدبدب، بدنا ناخذ بآخر ما وصل إليه وهيك اللغة بدّك تاخذيها بآخر ما وصل إلها. وشفتي اللغة إلّي بدّي ياها هلّق بعد 1000 سنة بدّها تموت وبدنا ناخذ اللغة مثل ما بـ تكون صارت بعد 1000 سنة.

س ـ وإيه إلّي بـ يحصل للتراث الأدبي العريق القديم الصيني وغير الصيني والعربي القديم؟ (00:49:32)

ج ـ سؤال كثير مهمّ كثير مهمّ. بـ يحصلّه مثل ما حصل للتراث المهمّ إلّي لغيرنا. اليونان وقت إلّي تركوا اللغة إلّي طيلعت أفلاطون وأرسطو وباندار والمرسحيّين الثلاثة العظام إيشيل وسوفوكل وإيريتيد، لمّا تركولهم لغتهم قالوا مـ نترجم الشيء العظيم منهم للّغة إلّي أخذناها، دائماً هيك بـ يصير. الإلياذة اليوم منقراها باللغات الحيّة، ما ممكن إذا عندنا شي عظيم بدّه يتترجم للّغة إلّي إجت بعدين لأنه مش المهم التراث أكثر ما المهمّ نحن. هون الفرق بيني وبين الشرق، هذا الإصلاح.

أهمية الإنسان مقابل المؤسّسة بالنسبة للأستاذ سعيد عقل (00:50:22)
(ثلاث دقائق وثمانية وخمسون ثانية)

نحن أهمّ من التراث، الإنسان هو إلّي بـ يعمل التراث مش التراث إلّي بـ يعمل الإنسان. إذا اللغة المحكيّة بـ تفيدني أنا وأنتِ، ما بـ يعود يهمّنا التراث. التراث مـ نترجمه إلنا، أمّا إذا اللغة الميتة بـ تدمّرنا أنا وأنتِ، ما بـ يحيينا التراث. الإنسان بالنهاية هو كلّ شيء. من هون بـ اقلّك الشرق عايش للمؤسّسة مش للإنسان. قوليله للشرق خرّبوا بيت واحد، حرقوا واحد ما بـ يتأثّر، قوليله هبّطوا كنيسة، بـ يشعل الشرق. لا، لازم نهتمّ للإنسان أكثر من الكنيسة وبـ اقلّك هيك عن الجامع وعن غير الجامع. الإنسان هو المهمّ مش المؤسّسة ومن هون بـ يقول القدّيس توما الأكويني، بـ يقولوله: "المؤسّسة أعظم والاّ الإنسان؟" بـ يقلّهم: "لو الله شاف السماء عم تهبّط وولد صغير عمّ يوقع، لأيّاها بـ يركض؟ لأيّ من الإثنين بـ يركض؟" بـ يركض بـ يخلّص الولد وبـ يترك السماء، مؤسّسته إلّي هي عرشه تهبّط لأنّ الولد أهمّ من المؤسّسة. الشرق بعده ممروض بالمؤسّسة ما صار ممروض بالإنسان، بينما بـ تلاقي أوروبا طيلعت حقوق الإنسان مش حقوق الدولة وحقوق الكنيسة وحقوق الكتاب. لأ، حقوق الإنسان. الشرق بعده مش عم يلعب لعبة الإنسان، عم يلعب لعبة المؤسّسة.

س ـ في إلك صورة هنا مع شاعر تركي عظيم اسمه ناظم حكمت. (00:52:07)

ج ـ أيوة مات يا حرام.

س ـ كنّا مـ نهتمّ فيه بالشرق ما اعرفش ليه؟ ربّما يمكن تقلّي ليه مـ نهتمّ فيه، ناظم حكمت بالذات اهتمّينا بيه كثير في البلاد العربيّة؟ (00:52:18)

ج ـ ناظم حكمت شاعر تركي وهجر بلاده بخلاف مع بلاده عقائديّاً واحتضنه العالم الشيوعي أو الإشتراكي وما عدش رجع على تركيا وطيلع شعر نضالي حلو مثل ما طيلع شعر عن مرته وابنه إلّي بقيوا بتركيا، فكان إلي مساهمة أنا بجعله يدخل على لبنان. نهار إلّي إجا على لبنان كان ممنوع يدخل على كلّ هـ الشرق الأدنى. استفزّوني إلي أنا، استعملت نفوذي ودخّلته على لبنان وقلتلّهم نحن ما مـ نفزع بلبنان من أي عقائديّة، واستقبلوه اليمين واليسار بفرد حفاوة. هذا مثلاً الشاعر بولس سلامة الكبير، منّوش يساري أبداً، استقبله، وأنا كمان منّيش يساري وعملناله تكريم كثير مهمّ، وهذا بـ احبّه جداً هـ الشاعر.

س ـ لو إجالك طبعاً استشانكو بردو بتقابله؟ (00:53:22)

ج ـ معلوم، أنا ما بـ افزع من العقائديّة.

س ـ لأنه الشاعر فوق مستوى؟ (00:53:28)

ج ـ وحتّى لو إجاني شخص عقيدته ضدّ عقيدتي كإنسان بـ احبّه مثل أي إنسان آخر، أمّا بـ احاربله عقيدته إذا كانت عقيدته ما بـ احبّها.

س ـ ناظم حكمت أستاذ سعيد، هل هو من محبّذي المؤسّسة والاّ من محبّذي الإنسان؟ (00:53:42)

ج ـ لا، ناظم حكمت من محبّذي الإنسان، حاكي أنا وايّاه مطوّلاً رغم من كون بـ يتّهموها للشيوعيّة مثلاً إلّي هو كان معتنقها، إنّها هي بـ تشدّد على المؤسّسة. لا، حرام خلّينا ننصف، فيكِ تشرحي الشيوعيّة بالتّشديد إنّها شدّدت كمان على الإنسان.

تلحين شعر الأستاذ سعيد عقل وعلاقته بالملحّنين (00:54:20)
(خمس دقائق وخمس ثوان)

س ـ في إلك صورة إستاذ سعيد انا خايفة نذكر التاريخ لأحسن يحرج بعض الناس إلّي فيها، يمكن سنة 27-28. الأستاذ عبد الوهّاب قاعد في الوسط وأنت على يمينه او على شماله، على يمينه أظنّ. مين الشخصيّات البارزة المعروفة كمان؟ (00:54:20)

ج ـ على يميني في الأستاذ نجيب صدقة إلّي صار اليوم أمين عام وزارة الخارجيّة، على شمال عبد الوهّاب في الشاعر عمر أبو ريشة وعلى يسار الأستاذ عمر أبو ريشة في جوزف أبو خاطر إلّي هو اليوم وزير التربية في لبنان.

س ـ كانت إيه المناسبة إلّي جمعتكم والأستاذ عبد الوهّاب سنة ... والاّ بلاش نحدّد؟ (00:55:03)

ج ـ بـ اظنّ أكثر من سنة 27 لازم 37 مش 27، لازم يكون سنة 37 بـ اعتقد أو بعد، كان عبد الوهّاب ضيفنا بزحلة وكنّا عم نتغدّى على الوادي.

س ـ الأستاذ عبد الوهّاب طول عمره بـ يحبّ لبنان قوي قوي وبـ يحبّ الطبيعة بـ توحي إليه بألحان جميلة. هل أنت صديقه أستاذ سعيد؟ (00:55:25)

ج ـ أنا صديقه لعبد الوهّاب على عدّة صعدان، بـ اعرفه من وقت إلّي كان يجي هو وشوقي. أنا ما عرفت شوقي عرفته بُعيد موت شوقي، كان يجي مع شوقي على لبنان وهو غنّى لنا قصيدة شوقي شقفة من قصيدة شوقي في زحلة، لكن ما غنّى أبيات منها بـ احبّهم أنا.

س ـ يا جارة الوادي؟ (00:55:57)

ج ـ يا جارة الوادي هي شقفة من قصيدة شوقي بزحلة، فيها بيتين حلوين لازم تعرفيهم بـ يقلّها:

إن تُكرمي يا زحل شعري إنّني

أنكرتُ كلّ قصيدةٍ إلاّكِ

أنتِ الخيالُ بديعهُ وغريبه

الله صاغكِ والزمان رواكِ

س ـ يا سلام يا شوقي، هل أنتَ مؤمن بأنّه أمير الشعراء؟ (00:56:21)

ج ـ إي، شوقي كنت اعدّه أمير الشعراء رغم حبّي لخليل مطران إلّي عرفته شخصيّاً وحبّيته جداً، إنّما مصرّ أنا على أنّه شوقي استحقّ لقب أمير الشعراء من كلّ قلبي بقولها.

س ـ بـ تطرب للموسيقى العربيّة حيث إنّ كنّا مـ نتكلّم عن اللّغة والحرف من لحظات. هل بـ تطرب لألحان عبد الوهّاب بما إنّه موسيقار الشرق أو ده لقبه مفروض؟ (00:56:41)

ج ـ مشكلة أنا مع الموسيقى العربيّة بدّي الموسيقى العربيّة الحديثة يمكن أقرب إلها. مثلاً القصيدة إلّي لحّنلي إيّاها عبد الوهّاب " مُرَّ بي" وغنّتله إيّاها فيروز، ما بـ احبّ لحنها كثير.

س ـ ما بـ تحبّ الطريقة إلّي لحّنلك بيها؟ (00:57:14)

ج ـ ما بـ احبّها كثير.

س ـ طيّب "مُرَّ بي" حـ نرجع لشعرك وصعوبته، "مُرَّ بي"، أنا افتكرته فعل مبني للمجهول أو... (00:57:16)

ج ـ لا، "مُرَّ انت بي"، مُرَّ بي يا واعداً وعد

س ـ فعل أمر؟ (00:57:27)

ج ـ فعل أمر للمذكّر، ليه لا؟ "مُرَّ بي" مثل "مُرّي بي"، أنتِ مش معوّدة تقولي لرجّال "مُرَّ بي"، لكن سمعانة "مُرّي بي" سهّلت عليكِ.

س ـ مُرّْ بي (00:57:44)

ج ـ لا، ما بـ يجوز تسكينها، بدّه يكون مُحرّك يا "مُرَّ" أو يا "مرِّ" "را كسرة"، لكن فضّلوا الفتح بحالة الأمر وبحالة الجزم "لم يمرَّ" عـ "لم يمرِّ".

س ـ طيّب أنا شفت قصيدة مبارح من ضمن الشعر إلّي بـ اقراه، لقيتك بـ تصلّح حاجات كثيرة، يعني تبقى كاتب البيت وبعدين تحطّ علامة كده بالقلم وترجع تحطّ كلام ثاني. (00:57:58)

ج ـ إي، بـ اصلّح كثير.

س ـ بـ تصلّح "مُرَّ بي"؟ ما حبّتش تصلّحها؟ تحطّ فعل ثاني غير "مُرَّ"؟ (00:58:11)

ج ـ لا، بالعكس بـ يحبّوها كثار هيذي قويّة كثير كلمة "مُرَّ بي".

س ـ بس ما عجبك اللحن، طريقة تلحينه؟ (00:58:21)

ج ـ اللحن ما حبّيته مع إنّي بـ احبّ عبد الوهّاب شخصيّاً.

س ـ طيب بـ تحبّ تلحين الرحبانيّين لشعرك؟ (00:58:27)

ج ـ إي، بـ احبّ تلحين الرحبانيّين لشعري وبـ احبّ تلحين واحد صديقهم للرحبانيّين هو فليمون وهبي، مع إنّه بعد ما لحّنلي شي ولكن بـ احبّ تلحينه. هو بـ يلحّن أشياء خفيفة.

س ـ تعتقد شعرك على صعوبته يستطيع فليمون وهبي مثلاً أن يلحّنه؟ (00:58:43)

ج ـ إي، فليمون ما تستهونيه، بـ احبّه.

س ـ بـ يقدر يلحّن شعرك؟ (00:58:50)

ج ـ بـ يقدر يلحّن شعري.

س ـ طيّب على العموم إذا طلب منّك أو أمر زي "مُرَّ بي" "لحّن لي"،الأستاذ فليمون وهبي يعني للأستاذ سعيد عقل؟ (00:58:56)

ج ـ لا ما لحّنلي بعد.

س ـ يعني يجب عليه يلحّنلك دي الوقت، أمر منك.(00:59:06)

ج ـ لا، بعد ما قلتلّه أنا هيك، أنا ما بقول لحدا يلحّنلي أبداً.

س ـ على العموم أنا رحت وجّهت نفس السؤال للأستاذ عاصي الرحباني، قلتلّه عايزين نعرف ازّاي بـ تلحّن شعر الأستاذ سعيد عقل إذا كان فهمه صعب يبقى تلحينه يبقى إيه؟ إسمع رأيه بقى شو قال. (00:59:11)

ج ـ شو قال؟

حديث مع الأستاذ عاصي الرحباني عن الأستاذ سعيد عقل (00:59:25)
(دقيقة واحدة وأربع ثوان)

س ـ أستاذ عاصي، يمكن مش ناس كثير يعرفوا إنّك صديق حميم للأستاذ سعيد عقل، من أيمتى بتعرفه؟ (00:59:25)

ج ـ بعرفه تقريباً من سنة الـ 51 ومن يوم إلّي تعرّفنا على الأستاذ سعيد، تعرّفنا على الشعر بحقّ وحقيقة.

س ـ وطبعاً أنت كفنّان وملحّن وموسيقار خير مَن يقدّر الشعر. لكن قل لي ماذا تعلّمت منه وتعتزّ به؟ (00:59:42)

ج ـ أولاً تعلّمت يعني دخّلني على مناطق بالشعر غريبة ما كنت بـ اعرفها لولاه، وغير الشعر عم قلّك بإمكانيته لأنه هو من قدّيش بـ اعرفه تقريباً، من 20 سنة، يخزي العين الله يطوّل عمره، من عشرين سنة تقريباً كلّ يوم مـ نشوف بعضنا وكلّ يوم بـ يقول شي جديد. فيكِ تتصوّري من 20 سنة دائماً عنده شي جديد ودائماً بتحسّي إنّه واقف ورا قضاياه مثل السّيف وما بـ يساير باللّي بـ يعتقده حقّ. بعدين كلّ ما بـ احكي مع الأستاذ سعيد بـ احسّ إنّ في عـ إيديه نذر ورسالة وبـ احسّ لمّا بـ احكي معه إنّي إنسان وشجاع وبطل وبـ احسّ إنّ العافية بخير والفرح بخير ولبنان بخير. (01:00:29)